An tɛ ban an fakan kunkanko kuma na ani u jɔyɔrɔ jamana ka ɲɛtaa siratigɛw la.

Kunnafoni dɔ filɛ nin ye k’o sɛmɛntiya

K’a ta kabini sɛ b’a fɔ kokoriko fɔ ka se waati min na tile b’a fɔ wulafɛ k’an bɛn tilebi fɛ n’a n’a ka sanu rɛyɔnw ye, muso bɛ yan !

A bɛ yan, kɔlɔnda la, a bɛ yan gabugu kɔnɔ, a bɛ yan kolonkala la, a bɛ yan tile kɔrɔ, a bɛ yan sanji kɔrɔ, a bɛ yan a makunnen, baara la, wa a bɛ yan n’a senteliman ye i n’a fɔ à bɛ ka kɛlɛ ka waati fɛ walasa ka se k’a ka tilebaaraw kɛ k’u lase : gabugu baara, cɛw nɛgɛnni ani ka demisɛnw jigi fa.

Muso, a bɛ yan !

A bɛ yan foro kɔnɔ, a bɛ yan kungokolon kɔnɔ dɔgɔsiri jukɔrɔ, a bɛ yan baganw cɛma, muso, a bɛ yan ni sɛgɛnbaliya ni muɲu ani hami ye ni demisɛnw ka ɲɛtaa ye ani diɲɛ bɛɛ.

Muso bɛ yan !

A bɛ yan biro kɔnɔ, a bɛ yan kan kɔnɔ, a bɛ yan dɔgɔfiyɛa la, a bɛ yan mobiliboli la, a bɛ yan pankurun kɔnɔ, a bɛ yan arajosow ni telewisɔnsow la, a bɛ yan, muso bɛ yan diɲɛjɔba kan walasa ka koko kari ka bɔ baaradaw ni ɲɔgɔn cɛ, kanw ni ɲɔgɔn cɛ walasa ka danfarabarajuru tigɛ ka bɔ jamanaw cɛ. Muso, a tɛ sɛgɛn, a muɲunen don.

A bɛ yan, muso, garaziw kɔnɔ, potow sanfɛ, kalansow kɔnɔ, wa u bɛ yan dɔgɔtɔrɔsow kɔnɔ.

A bɛ fan bɛɛ !

A bɛ yan, muso, yɔrɔjan, tunka fɛ ka kɔngɔ, minɔgɔ ani ɲɛnafin muɲu walasa k’a seko kɛ du ka ɲɛtaa la, jamana ka ɲɛtaa la an’a ka juruya sabatili.

Aw ni ce, an baw !

Aw ni ce baarada bɛɛ la, an faw kɛrɛfɛ walasa k’a jira u ko doni ka girin, ko aw bɛ yan k’u dɛmɛ k’a ta, o kɛtɔ, aw ma ɲinɛn anw kɔ, anw minnu y’a dens ye.

A bɛɛ n’a ta, aw minnu bɛ an faw dusu suma, k’anw ka tɔɔrɔ muɲu, aw b’o bɛɛ kɛ makun ni sabali kɔnɔ, aw ye baji jabali ye. Aw ye baji jabali ye bawo aw ma danfara don diɲɛ demisɛnw ni ɲɔgɔn cɛ, an bɛɛ y’aw denw ye wa k’aw to an faw kɛrɛfɛ, diɲɛ bɛɛ taɲɛ wa bɛn bɛ sabati diɲɛ fan bɛɛ.

Aw ni ce !

Marisikalo tile 8, musow tɔgɔladon hukumu kɔnɔ, Halisa An ma kɛ Hakilitigi bɛna Ɛntɛrinɛtikalan kɛ lakɔliden dɔw kunna. Kalanden ninnu ye dugumalakɔliso, lise ani sanfɛkalanso lakɔlidenw ye.

Kalan in bɛna kɛ fɛn minnu kan, o ye ka ɲinini kɛcogo jira kalanden ninnu na Ɛntɛrinɛti kan ani k’a jira u la Ɛntɛrinɛti bɛ se k’u dɛmɛ u ka kalan na cogo min na n’u tɔgɔsɛbɛnni ye yɔrɔjankalanw na fu la ani kunnafoniw ɲinini.

O kɔfɛ, mɔgɔw bɛ se ka kɛ jɛkuluw ye siti minnu kan, an bɛna olu n’u nafa jira u la, ka bulɔguw jira u la k’u nafa fɔ u ye ani ka kumaɲɔgɔnya sitiw jira u la i n’a fɔ gmail, yahoo, twitter, skype ani k’u dege bataki cili n’a jaabili cogo la Ɛntɛrinɛti kan.

Kalan in bɛ kuncɛ ni imayili dɔ dayɛlɛli ye lakɔliden ninnu kelen kelen bɛɛ ye.

N t’a dɔn n’a bɛ o cogo kelen na jamanaw bɛɛ kɔnɔ, n’o tɛ a bɛ waatijan bɔ warimisɛnkogɛlɛya bɛ Mali la.

Isansifeereyɔrɔw la, « warimisɛn tɛ yen ! Bitikiw kɔnɔ, warimisɛn tɛ yen ! Nanfɛfeerelaw bolo, « warimisɛn tɛ yen ! A ko de ka jugu feerekɛla misɛnninw bolo ! An deli la « warimisɛntɛyen » fɔli la, fɔ n’i taara sanni na, bitiki b’a ɲɛjɔ i tɛgɛkɔnɔna na fɔlɔ k’a lajɛ warihakɛ min b’i bolo walasa k’a labɛn « warimisɛntɛyen » fɔli kama n’an y’an ka fɛnsanta fɔ.

Tuma dɔ la, an bɛ moto kolonkolon ka tɛmɛ isansifeereyɔrɔ 3 walima 4 na k’a sababu kɛ warimisɛnko ye.

O ko in delila ka ne yɛrɛ sɔrɔ siɲɛ caman isansisanyɔrɔw la, nka n tɛ se ka ɲinɛn min kɔ, o ye min kɛra falajɛ ye, bawo n sɛgɛnna o don kosɛbɛ.

N tun taara surunalidon kɛ n denkɛ n’a ka patɔrɔn cɛ, n’o ye mobiliparanti ye. N segintɔ, kɔmi n b’a dɔn ko isansi tɛ n se so, n ye jɔ isansifeereyɔrɔ dɔ la Falajɛ walasa ka isansi san. Waribiye dɔgɔmanin min bɛ n bolo o yɔrɔ la, o ye 400 biye ye, ne mako bɛ isansi litiri kelen na n’o sɔngɔ ye 130 ye.Isansifeerela kɛlen ka wari ye, a ko warimisɛn tɛ yen. N ye min kɛ ka munumunu n kini ni n numan fɛ ka 400 warimisɛn ɲini, o ka ca ni miniti 30 ye, n m’a sɔrɔ fiyɛwu. Bɛɛ ko n ma, ko warimisɛn tɛ yen. N y’a ŋaniɲa ka fɛn dɔ yɛrɛ san, hali n mako tɛ se min ma o yɔrɔ la walasa n ka warimisɛn sɔrɔ, nka abada. N seginna ka n’a fɔ isansifeerela ye ko a ka 200 la kɛ n kun, a ko warimisɛn tɛ yen. N diyagoyara ka isansi 400 na san o don, ka sɔrɔ n makoba tun bɛ waritɔ 200 la.

Tile kurukara kɔnɔ, an bɛ nin ko in ye bitikiw kɔnɔ, suguw la, feeremisɛnnikɛlaw fɛ, wa siɲɛ caman, n ye gadonmusow kɛtɔ ye k’u ka nisɔngoyakumaw fɔ nin gɛlɛya in kan, gɛlɛya min n’u b’a sɔrɔ nasanyɔrɔ la warimisɛnko la.

Warimisɛntɛyen dama tɛ, nka warimisɛn min bɛ an bolo, olu bɛɛ sinnen, feerekɛlaw tɛ sɔn k’olu minɛ. Waati dɔw la 100 warimisɛn dɔrɔmɛ 20, dɔrɔmɛ 10 ani dɔrɔmɛ 5 la, o bɛ se ka k’i bolo i ka so, nka a tɛ se ka dun k’a sababu kɛ a bɛɛ sinnen don.

Nin warimisɛnko in bɛ ka kɛ gɛlɛyaba ye bi : a bɛ sannifeere senasumaya, a bɛ an bali ka an makoɲɛfɛngɛlɛnw sɔrɔ joona, wa a bɛ an ka waati bɛɛ ta.

Bolimafɛnw caya kama Bamakɔ, bolimafɛntigiw bɛ ɲagami ɲɔgɔnna tuma bɛɛ. O bɛ gɛlɛya don sirako la, wa o ye sirabakan kasara caman sababu ye.

Walasa ka nɔgɔya don sirako la Bamakɔ, jamanaɲɛmɔgɔw ye esanzɛri dɔ jɔli daminɛ sira nimoro 5 nan ni Nkuwame kuruma tɔgɔlasira bɛ tɛmɛ min fɛ.

Nin ye santiye ye min ye gɛlɛya don sirako la ka taa Jikɔrɔnipara la, gɛlɛya min, ni bɛɛ ka kan k’a kun yanni baaraw ka ban bawo ni barraw banna fura bɛ sɔrɔ sirakogɛlɛya ni sirabakankasara la ni bɛɛ ye sirabasariyaw bato. Polisiw bɛ yen ka sira tɛmɛnsira jira mɔgɔw la bawo sira dɔw tɛmɛnni jɔlen bɛ waatinin kɔnɔ fɔlɔ yanni barraw ka ban.