N’i ye Ba bonya lajɛ, k’a daɲɛ fɔcogo lajɛ, a b’i ko Ba, n’o ye woloba ye, o ni Ba, n’o ye baji ye, o bɛɛ ye kelen ye. A Ba fila bɛɛ fɔcogɔ ye kelen ye, wa u ka kɛtaw bɔlen bɛ ɲɔgɔn fɛ.

Ba ka bon i ko baji, a tɛ fa a den na fiyɛwu. A bɛ sɛgɛn a nɔfɛ, a b’a ka tɔɔrɔw kun, a b’a ladon, a b’a bila sira, a bɛ hadamadenya siraw jira a la. A tɛ sɛgɛn ni si la. Den ɲɛna o, Ba b’a fɛ, a tiɲɛna o, Ba b’a fɛ. O de kama maakɔrɔw ko: “hali ni muso den kɛra sa ye, a b’a siri a cɛ la”. Den kɛra maakɛnɛ ye o, a kɛra banabatɔ ye, a Ba b’a fɛ o bɛɛ la. Den kɛra fɛntigi ye o, a kɛra fanta ye o, Ba bɛ den fɛ. Den mana kɛ cogo o cogo la, Ba b’a fɛ o bɛɛ la, Ba b’a kalan hadamadenya la, k’a ladi, k’a bila sira, k’a jira a la ko diɲɛlatigɛ man nɔgɔ,

Den mana kɔrɔbaya cogo o cogo, a mana kalan cogo o cogo, a mana kodɔn cogo o cogo, n’a gɛrɛ la a ba la, a bɛ kɛ a ɲɛna ko a bɛ baji cɛ la bawo a bɛ fɛnw mɛ a tulo la waati bɛɛ a tun tɛ min dɔn kakɔrɔ.

Ni n ye nin ko in lajɛ den ni a ba cɛ, a bɛ kɛ ɲɛkɔrɔ i ko den bɛ dɔnni baji cɛ la. Den b’a min, a b’a ko, a b’a munumunu baji la a tɛ ja fiyɛwu.

O de kama, n ye miiri ka Ba bonya lajɛ, a fɛrɛlen don i ko baji. Baji bɛ a kɔnɔ fɛnw kun cogo min, baji wasa bɛ a kɔnɔ fɛnw na cogo min na, ba fɛrɛlen bɛ den bolo ten, Ba bɛ a den ka kow kun ten, Ba wasa bɛ a den na ten.

O kɔfɛ, Ba ani Ba, u fila bɛɛ daɲɛ fɔcogo ye kelen ye. Nin bɛɛ de y’a jira n na k’a fɔ ko a bɔlen bɛ a fɛ i ko Ba daɲɛ jujɔn tara Ba kan ka da u fila bɛɛ bonya kan.

Ba ka nin bɛɛ kɛli den ye, o ni ba bɛ fɛ ka den tiɲɛ, olu tɛ kelen ye bawo Ba bɛɛ bɛ fɛ a den ka don da la. Nin kɔrɔ tɛ fana ko Baw ka u den diya u ye fɔ ka dɛsɛ k’u lamɔ. nin kɔrɔ ye k’a jira ko Ba bonya jira la i ko baji ka bon cogo min na ka dan Ba ka baaraw, a ka sɛgɛnw ani a ka muɲu kan den ka diɲɛlatigɛ kama.

Nin kɔrɔ tɛ fana k’a jira ko fa tɛ fɛn kɛ. Laɲini bɛ min nɔfɛ, o de ye k’a jira Ba daɲɛ bɔra min Bamanankan na.

O la, n b’a ɲini bamanankandɔnbaw fɛ u ka n bila sira nin hakilina in kan.